მაკა ჯოხაძე
მაია ჯალიაშვილი (შტრიხები პორტრეტისათვის)
ჩვენი ცხოვრების სამივე დროში ერთმანეთს ენაცვლებიან
აჩრდილები, სახეები, სილუეტები, ხმები, ინტონაციები,
სახის ნაკვთები თუ გამოხედვები...
ზოგჯერ იწყება შემოტევები _ მეხსიერების ქარბუქები.
მათი ჩადგომისას კი ისე გადაიწმინდება ხსოვნის ნამქერი, როგორც დაორთქლილი სარკე და
ამ სარკის ტბიდან იცქირებიან ძვირფასი თვალები, პორტრეტები, პიროვნებები...
მაია ჯალიაშვილი
ჩემთვის, როგორც ადამიანისათვის, პროფესიონალისთვის, კოლეგისა თუ, უბრალოდ, მკითხველისათვის
ღვთის ნაჩუქარი ოქროს მედალიონივითაა, თილისმასავით სულ რომ თან დაატარებ და გეიმედება.
ამ იმედს დრო ვერ ცვლის, ვერაფერს აკლებს. ასე მგონია ჩემი სულის მონათესავედ, შემწედ და მეოხად გააჩინა ღმერთმა. უფრო მეტიც, დარწმუნებული
ვარ, ნებისმიერი საუკუნის, ნებისმიერი ეროვნების ხელოვანი, ვის შემოქმედებასაც მაია
შეხებია, ასეთად მიიჩნევდა და მიიჩნევს მას.
რაზედაც და ვისზედაც არ უნდა წერდეს მაია ჯალიაშვილი,
ფართო თვალსაწიერთან, დიდ ინტელექტთან, არაორდინარულ ინტერპრეტაციასთან ერთად, უპირველეს ყოვლისა, თვალში გვხდება სხვისი ნიჭის
გახარების უნარი, რაც, სამწუხაროდ, თვით პროფესიონალებშიც კი იშვიათია დღეს.
მაია ჯალიაშვილს, ასევე, გააჩნია ის ბუნებითი თანდაყოლილი დელიკატურობა, რითაც,
მოდით, ასე ვთქვათ მისთვის არც თუ ისე სასურველი მხატვრული ტექსტის განხილვისას ობიექტურობას
ინარჩუნებს და სათქმელს ყოველთვის უკომპრომისოდ გვაწვდის. ეს კი სხვა არაფერია, თუ
არა პროფესიული პატიოსნება. იქნება ვცდები კიდეც, მაგრამ რატომღაც მგონია, რომ, ზოგადად,
მხატვრული ნაწარმოების მაია ჯალიაშვილისეული წაკითხვები ასეთი სიღრმისა და ესთეტიკური
სიამოვნების მომნიჭებელი ვერ იქნებოდა, თავად იგი რომ (როგორც იტყვიან) მხოლოდ წმინდა
წყლის მეცნიერი იყოს და არა შემოქმედი, უპირველეს ყოვლისა. უბრალოდ, სამეცნიერო ასპარეზზე,
რეცენზირება- რედაქტირება იქნება ეს, ხარისხის მაძიებელთა ხელმძღვანელ-ოპონირება, პედაგოგიკის
სამყაროშიც წლებია უკვე, იმდენად ნაყოფიერად და ყოველწამიერად მოღვაწეობს, რომ ამ განუწყვეტელმა
ღვაწლმა თითქმის გადამალა მისი პროზა-პოეზიით მოგვრილი გაოცება და სიამოვნება. თუმცა
სწორედ შემოქმედებითი ტალანტია, მაიას სამეცნიერო ნაშრომებსა და თხზულებებს ხიბლს რომ
მატებს და განუმეორებელს ხდის.
მხატვრობის ექსპერტებთან წამიკითხავს, რომ იშვიათია
ფერმწერი, რომელიც ერთნაირად ფლობდეს პეიზაჟის, პორტრეტის, ნატიურმორტის ხატვის ხელოვნებასა
და ტექნიკას, ერთი სიტყვით, ფერწერის სხვადასხვა ჟანრებს.
თუ ამ კუთხით შევხედავთ მაია ჯალიაშვილის შემოქმედებას,
აღმოვაჩენთ, რომ იგი თანაბარი ძალითა და გატაცებით მუშაობს ლიტერატურის სხვადასხვა
ჟანრში, იქნება ეს ლიტერატურათმცოდნეობითი წერილები, სტატიები, ესეები, გამოკვლევები
თუ პიესები, იგავ-არაკები, ლექსები... ეს მართლაც იშვიათი გამონაკლისია...
თითქმის ყველა ამ ჟანრში შექმნილ ნამუშევრებში იხატება
მახვილგონიერების, იუმორის, სიხალისის ისეთი ფეიერვერკები, სადღეისო, თანამედროვე მხილების
ისეთ დღესასწაულებს ესწრები, მაგალითად, იგავ-არაკებში, რომ ბუნებრივად გახსენდება
ძველ სამეფო კარზე მიღებული, ე.წ. ბრძენი მასხარები, თვით ხელმწიფეთა „გაროზგვაზეც“
რომ არ ამბობდნენ უარს, ოღონდ სამართალს ეზეიმა, ოღონდ სიმართლე არ დაჩაგრულიყო.
სულხან-საბასა
თუ ეზოპესეული სიბრძნე (ჭკუა), სინათლე და გამჭვირვალობა ახლავს არაკებს: „მჭევრმეტყველი კურდღელი“ იქნება ეს, „ჭკვიანი დათვი“,
„უსკამო პრეზიდენტი“, „ნაგვის ყვავილები“, „დემოკრატიის ხიბლი“, „მონასტრის თაგვი“
თუ ა.შ.
„მჭევრმეტყველი კურდღლის ამბავი“ ხომ ისეთი აქტუალურია,
პირდაპირ ჩვენს ცხოვრებაში რეალურად არსებული პერსონაჟები გაგახსენდებათ, „უქმად მეტყველების
დიდოსტატებში“ კი იოლად ამოიცნობიან პოლიტიკანები, ექსპერტები, ფილოსოფოსები, სხვადასხვა
ორგანიზაცია, დაჯგუფებები და პარტიები, თავიანთი სიხარბითა და უკონტროლო ამბიციებით... ისეთი სიმშვიდე და უბრალოება
ახლავს მაიას იგავ-არაკებს, გაგიკვირდებათ. მხოლოდ ბასრ და მოქნილ გონებას შეუძლია
შეთხზას თუნდაც აი, ეს არაკი „ძალა და აღმართი“:
„ძალა აღმართს მიადგა. ხვნა დაუწყო.
აღმართი დუმდა და ფიქრობდა.
კარგად ვიცი, რა ვაჟკაციცა ბრძანდები, შენი აღმა ხნული
ბევრი მინახავს, მაგრამ იმ ნახნავზე მოწეული მოსავალი კი არაო“. https://maiajaliashvili.blogspot.com/2011/02/blog-post_5024.html
კიდევ ერთი ფანტასტიკური მაგალითი: „კაცდაკარგული სინდისი“
ჰქვია ამ არაკს:
„ყოველმხრივ შემკული და ლამის უნაკლო, დარდისგან აღარ
იყო სინდისი. კაცი დაეკარგა. ან ავლილი, ან ჩავლილი, ხომ არ გინახავთო. როგორ არაო.
ხეებმა. ავლილიც გვინახავს, ჩავლილიცო.
ალბათ, იმასაც ჩემსავით გული სტკივაო.
აბა, როგორ არაო. შენს ნატერფალს თუ სადმე შენიშნავს,
დაოთხილი შორდებაო.
ნეტავი შენ, რას მოსთქვამო.
აბა, უკაცო სინდისი სად გაგონილაო.
გუშინაც ვნახე, საწყალიო, _ მუხა ჩლიფინებდა. _ სოფლის
თავში იჯდა და ამვლელ-ჩამომვლელს ემუდარებოდა, მაპოვნინეთო“. https://maiajaliashvili.blogspot.com/2011/02/blog-post_5024.html
ნეტავი იმასაო. შრიალებდნენ ხეები. ისინი უკაცოდაც ხარობდნენ“.
რაც შეეხება ლექსების კრებულს „გულის ბარძიმი“, რომელიც
ნამდვილი პოეზიაა. მასში პროზად დაწერილ ტაო-კლარჯეთის დღიურებსაც უცრემლოდ ვერ წაიკითხავს
კაცი.
საქართველო პირადად ჩემთვის უთარგმნელი ლექსია, რომლის
ბოლომდე სრულყოფილი მიღება, გაგება და ახსნა, განსხვავებით პოლიტიკოსების, დიპლომატების,
მეცნიერებისა და ფილოსოფოსებისაგან, მხოლოდ ნამდვილი პოეტების ხვედრია. „ლურჯად ნახავერდები უდაბნოს“ გარდა გალაკტიონის
ოკეანისეული სიღრმის არქივში, როგორც ვარდი
სილაში, ისეა ჩაძირული სისხლივით დარდიანი სტრიქონები: „მოუნათლავი ბავშვები სკოლისკენ მიიჩქარიან“. როგორ
გაიგებს უცხოელი მკითხველი ამ დარდს, რომელმაც არ იცის, რას ნიშნავს ნათლობა.
ჩემთვის ასევე უთარგმნელი ლექსია მაია ჯალიაშვილის
„ხანძთა“.
ამ ლექსმა ახლახან საქართველოს მეცნიერებათა აკადემიაში
ანას 100 წლისთავისადმი მიძღვნილი საიუბილეო საღამო გამახსენა. თავის დროზე ლექციებიდან
დაბრუნებულ ანას ძმისშვილს, გიორგი კალანდაძეს, ოჯახისთვის ასეთი რამ მოუყოლია: დღეს
ლექტორმა გეგეშიძემ პოეზიაზე საუბრისას გვითხრა,
ორი სვეტიცხოველი არსებობს, ერთი მცხეთაში,
მეორე კონსტანტინე გამსახურდიას აგებული „დიდოსტატის მარჯვენაშიო“, ორი ნიკორწმინდა
გვაქვს ქართველებს, ერთი რაჭისა და მეორე გალაკტიონისო. ორი გვაქვს დავით აღმაშენებლის
საფლავიც, ერთი გელათშია, მეორე ანას ლექსშიო.
ჩემდა სამწუხაროდ,
ტაო-კლარჯეთი ჯერ არ მინახავს, მაგრამ უნახავადაც შემიძლია დავადასტურო, რომ ხანძთაც ორი არსებობს,
ერთი მტრების მიერ მშობლიური წიაღიდან მოწყვეტილი საქართველოს მიწაზე და მეორე _ მაია
ჯალიაშვილის ბრწყინვალე ლექსში „ხანძთა“. ჩემთვის ეს ლექსი უთარგმნელია, რადგან უცხოელი,
თუ იგი საქართველოს მსგავსი ბედუკუღმართი ისტორიის მქონე ქვეყნის შვილი არაა თავადაც,
ამ ლექსის სიმწარეს ვერაფერს გაუგებს. საფინალოდ
სწორედ ეს ლექსი შემოვინახე:
„ის მიტოვებულს
ჰგავს მოხუც მამას,
უძღები შვილის
ბედით სნეული,
მზე რომ ამოვა,
ძვლებს მიაფიცხებს
ხანძთა_
ხერხემალგადამსხვრეული.
სველ ქუთუთოებს
ძლივს ასწევს მაღლა
ფსალმუნთა სითბოს
მონატრებული.
და დახავსებულ
ხმით ღმერთს ადიდებს
ლოცვებში
ჩამდნარ_ჩანაცრებული“. https://maiajaliashvili.blogspot.com/2011/01/
სიტყვა წარმოთქმულია 2025 წლის 22 თებერვალს მწერალთა
სახლის პროექტ-შეხვედრა „მუზას“ ლაურეატებთან გამართულ საღამოზე.